Бу мақола БЎЙИНБОҒ учун ёзилмаган 

Сахий қуёш осмонга кўтарилгани ҳамоно вужудинг яйрай бошлайди. Кимдир бу яйрашдан ҳаракатга тушиб уруғ сочади, яна кимлардир ҳосилни йиғиб олади. Фақат бази бир  дарахтларнинг нурни тўсиб соя солаётганлигини ҳисобга олмаганда ёруғлик барчага етарли. Ана шундай елкамизга тушаётган ёруғликдан роҳатланиб биз ҳам ўз ишимизни бошлаб юборганимизга анча бўлди.  Яни, камина–ТУЛКИВОЙ бошлиғим ОЛАПАР билан биргаликда ўрмонимизда янги газета очдик. Бу жуда қувонарли ҳол бўлди. Шундан бери елиб-югуриб кимнинг кўзига ола, кимнинг­­ кўзига қора кўриниб юрибмиз. Шу десангиз каминаи камтарин мухбир бўлиб ишлайман. Жойлардан мақолалар тайёрлаб  бошлиғим ОЛАПАРга топшираман. У эса уёқ-буёғини тўғирлаб босишга буюради. Тайёр бўлган газетани ўрмондаги йирикроқ ва баландроқ дарахтларга илиб чиқаман. Сезган бўлсанггиз ишим жуда оғир, барча юк менинг гарданимда. Аммо, ишим ўзимга жуда ёқади. Тўғри, бошида бир қанча ёқмайдиган жиҳатлари ҳам бўлди. Нима учун, дейсизми? Ҳа, бунга етарли сабаблар бор. Келинг яхшиси ҳаммасини бир бошдан айтиб берай.

Бир куни берилган топшириқлар юзасидан ўрмон чеккасидаги асаларилардан хабар олгани йўл олдим. Бориб қарасам МАЙМОҚВОЙ қишга ғамланган асални ари-париси билан қўшиб, чордона қуриб паққос туширяпти. Анжомларни қўлимга олиб дарҳол бу воқеани ёритишга киришдим. Аммо, МАЙМОҚВОЙ бу жараённи ёзмайсан деб туриб олса бўладими. Нима эмиш, бир бочка асал берармиш. “Асалингни ҳам, ўзингни ҳам… ёзаман” дедим. Ҳа, азизлар, кичкина юрагимни қўлимга олиб айнан шундай дедим. Миттигина жуссамиз бўлсада тоғдек виждонимиз бор. Қоринни кам ўйласак ҳам виждонни кўп ўйлаймиз. Тайёрланган қораламани қўлимга олиб ишхонага жўнадим. Бориб қарасааам… биласизларми нима бўлди? МАЙМОҚВОЙ мендан олдин келиб бир бочка асални ўртага қўйиииб ОЛАПАР билан ялаб ўтирибди. Энди буёғи ўзингизга маълум… Лекин, мақолани чиқардик, фақат!.. фақат... озгииина ўзгартиришлар билан. Бу жараён менинг виждонимга зарар етказган бўлсада, газетамизга анча фойда келтирди. Энди уни айиқлар ҳудудига ҳам ила бошладик.

Таҳририятимизга қуёнлардан келиб тушган шикоят юзасидан суриштирув мақсадида улар томонга йўл олдим. Борсам, ҳаммаси рост. Чиндан ҳам НОРБЎРИ  уларни анча қийнаб қўйибди. Қуёнлар ночор аҳволга тушиб қолган. Суриштирувни кўнгилдагидек битириб, қуёнларнинг катта умидини орқалаб ортимга қайтдим. Бир вақт кўзидан ўт сачраб, тишини кўрсатиб НОРБЎРИ йўлимни тўсса бўладими. Жон-поним чиқиб кетди, азизлар! Қовурилган жўжага қарагандай бақрайиб турибди. Бутун ҳаётим кўз олдимда бир сонияда гавдаланди…  Таҳририятга қайтиб ОЛАПАРга шикоят ёлғон эканлигини айтдим.

Тинчроқ мавзу билан шуғилланиш мақсадида қоғоз-қаламни қўлимга олиб ўрмонимиз мевалари ҳақида ёзишга киришдим. Уларнинг турлари, умумий ҳосил ҳажми ҳақида ёзмоқчи эдим, азизлар. Аммо, изланишлар натижасида ҳосилнинг катта қисми ўрмонимиз омборига тушмасдан маймунлар томонидан ўзлаштирилаётганлиги маълум бўлди. Шу билан бу мақола ҳам ёруғ дунёни кўрмасдан кўз юма қолди. Нимага дейсизми? Ахир, маймунларнинг бунақа иш қилаётганлигини ёзиб бўладими. Газетамизни иладиган дарахтлар уларнинг тасарруфида-ку. Дарахтлардан фойдаланишдан маҳрум қилса газетамизни қаерга иламиз, бўйнимизга осиб юрамизми?..

Бошим деворга урила-урила десам нотўғри бўлар, аниқроғи, бошимга девор уриб-уриб ҳаммабоп мақолалар ёзишни ўрганиб олдим, азизлар. Эндиги мақолаларим ҳеч қандай тўсиқсиз босилиб чиқаяпти. Мақолалар ҳам ажойиб. Қандай, денг? БУЛБУЛнинг қариганию, ТЎТИнинг концерт бергани, КАПАЛАКнинг севгисию, ҚЎНҒИЗВОЙнинг иккинчи хотини, ТОВУСнинг уйидаги жанжалидан тортиб, ТОВУҚнинг қандай овқат тайёрлашигача ёзаяпман. Бу жуда осон, энг асосийси, даромадли ҳам. Тўғриси-да, бир ўтиришда ёзиб ташлайдиган нарсангга қалам ҳаққини қуртдай қилиб санаб олганингдан кейин даромадли бўлмай нима бўлсин. Бундан ташқари мукофотлар ҳам олиб турибмиз. Буларнинг энг кўзга кўрингани яқинда бўлди. Қилаётаган ишларим эвазига арқони узууун қилиб боғланган яп-янги бўйинбоғ совға қилишди…

Нажмиддин Эрматов

YULDUZLARGA MEN HAM QARAYMAN

Yulduzlarga men ham qarayman,
Yulduzlar - samoviy bir xayol.
Men ko'proq zaminga yarayman,
Menga kerak yerdagi hayot.

Yulduzlarga men ham qarayman,
Yulduzlar - chaqnagan orzular.
Huv miskin kezadir bir odam -
Ko'ksida yonmagan yulduzlar.

Yulduzlarga men ham qarayman,
Ba'zida keladir havasim.
Ba'zida bosadir og'ir g'am,
Ba'zida yetmaydir nafasim

MEN OLAMDAN O'TGANDA

Ishq-vafodan so'zlaganlarim
Yetur senga ohu-fig'onim.
Yodga tushar bo'zlaganlarim
Men olamdan o'tganda, jonim.

Qaltirarsan ajib sezgidan,
Har bir so'zim - oshkor jahonim.
Judo bo'lding buyuk sevgidan-
Men olamdan o'tganda, jonim.

Sen qoshimdan keta olmassan,
Ko'zlaringda turarman yonib.
Sevgimni rad eta olmassan
Men olamdan o'tganda, jonim.

DARPARDANI OCHAQOL, JONIM

Yorug'likni o'g'irlab sekin
Tevarakni qurshadi tuman.
Ermak qilib tun cho'kdi, lekin
Eshik ochib chiqmadingku san?

Deydilarki, sening ko'zlaring
Afsungarmish, sehr etarmish,
Kimki ko'rsa bir bora seni
Oyoq yetganicha ketarmish.

Sovuqni ko'r, yuzni chimchilar,
Masxaraman unga bu zamon.
O'ylarimga kelib sanchilar,
Oy emas ul - u qotil kamon.

Bunda har ne ermaklar meni
Qorong'idir axir jahonim.
Hech bo'lmasa ochgil darchani,
Darpardani ochaqol, jonim.

Ko'zlarimga sig'magan chiroy

Muhabbat qirralari

Sevgi erkinlik yo‘lida qurbon bo‘lishga ham tayyor. F. SHILLER Muhabbatdangina muhabbat tug‘iladi. V. G. BELINSKIY Oshiqning o‘zi uzsin mo‘habbatning gulini, Axir bu noyob tuyg‘u boshdan-oxir, batamom, Faqat uning o‘ziga mangu etilgan in’om. F. SHILLER Bir boqishda tug‘ilgan muhabbatning davosini topish ayniqsa qiyin. J. LABRUYER Oshiq va ma’shuqlar bir-birlari bilan uchrashganlarida mutlaqo zerikmasliklarining boisi shundaki, ular to‘xtovsiz ravishda o‘zlari haqida gapiradilar. F. LAROSHFUKO Olamda sevgilingning siymosidan zeboroq chehra, uning ovozidan ham yoqimliroq musiqa yo‘q. J. LABRUYER Hamma ovozlar ichida eng yoqimlisi — bu biz sevgan ayolning ovozidir. J. LABRUYER Oshiqlar visoliga hamisha vaqt yetmaydi. I. GYOTE Hayotga muhabbat uyg‘otmoq uchun ozgina umidning o‘zi kifoya. Ikki-uch kundan so‘ng esa umid yo‘qolishi mumkinu, ammo o‘rtada muhabbat tug‘ilib qoladi. STENDAL Boshqa bir odam qalbidagi muhabbatni mahv etishdan ham og‘ir va kechirilmas gunoh yo‘q. G. IBSEN Dunyoda dahshatli yovuzliklar ko‘p, ammo hammasidan ham dahshatlirog‘i — muhabbatni bo‘g‘ish. B. PRUS Muhabbat o‘limdek kuchliligini bilamiz, ammo u shishadek mo‘rt hamdir. G. MOPASSAN Ko‘ngil savdosida ham yil fasllariga o‘xshab birinchi ayozlar nihoyatda sezilarli bo‘ladi. P. BUAST Muhabbat jarohatlari hammavaqt ham o‘ldirmagani bilan baribir hech qachon bitib ham ketmaydi. J. BAYRON Agar sevgini o‘lchab bo‘lsa, u qashshoq sevgidir. V. SHEKSPIR O’z muhabbati haqida shovqin-suron ko‘tarishni yaxshi ko‘radigan odamgina seva oladi, deyish xato; aqlli odamning his-tuyg‘ulari so‘zida ham, ishida ham aks etib turadi, yana ba’zilarida bu faqat amalda bo‘ladiki, ehtimol, shu indamasligi uchun ham ularnin tuyg‘usi kuchlidir. N. G. CHERNISHEVSKIY O’z muhabbatingni chuchmal maqtovlardan ko‘ra, foydali ish bilan izhor etganing ma’qul.  D. I. PISAREV Chin muhabbatning tili lol, sababi, haqiqiy his-tuyg‘ular so‘zdan ko‘ra amalda ko‘proq zohir bo‘ladi. V. SHEKSPIR Ma’shuqa turgan joyda har qanday so‘zamol og‘izlar ham gung-soqov bo‘lib qoladi, aytishni shu qadar xohlaganidan ayni tilning uchida turgan gaplar ayniqsa esdan chiqadi.  M. SERVANTES Men shunday oshiqman yagona, tanxo, Dunyoning sevgisi bir ko'nglimda jo. Yaralgandan buyon nelarni ko'rib, Men kabi oshiqni ko'rmagan dunyo. Bunchalik sevgidan Xudo hayratda, O'lchashga tarozi aylasa tortiq. Sevgimni o'lchashga yetmaydi kuchi, Ko'nglimdagi sevgim undanda ortiq.                                          Najmiddin Ermatov OG'RIQ Deylik, qo'li kesib tashlangan odam yo'q qo'l zirqirashin his qilar emish. Sevgilim, men seni sog'indim qattiq. Azob chekmakdaman. Og'riyabsanmi?                                         Matnazar Abdulhakim Taqillatma eshikni dilhun, Bas qil endi bir nafas qo'yda. Men uyimda bo'lmayda bugun, Ertaga ham bo'lmasman uyda. Sen shoirsan, sen zo'rsan ming bor, Nechun yana ko'ngling to'lmaydi. Meni tinch qo'y avlodlarga bor, Avlodlar ham uyda bo'lmaydi.                                        Aleksandr Feynberg БИР КУНИ Бир куни дарахтни тарк этар япроқ, Яланғоч новдалар титрар асабий. Висол оқибати ҳижрондир, бироқ, Фақат биз биргамиз, жоним, абадий! Бир куни ўзанин ташлайди дарё, Саҳролар гул бўлар, водийлар — саҳро. Елкамдан кетмайди хушбўйинг асло... Фақат биз биргамиз, жоним, абадий! Бир куни юлдузлар учар пойма-пой, Сайёралар топар ўзга жойдан жой. Бир куни Заминни ташлаб кетар Ой, Фақат биз биргамиз, жоним, абадий! Бир куни ўзидан тонар Кун аён, Лаҳзада руҳ билан видолашар жон. Фақат сен кетмайсан мендан ҳеч қачон! Фақат биз биргамиз, жоним, абадий!                                      Иқбол Мирзо